To我最愛的：
上星期日一個人上船。
記得上次我同你尖沙嘴海旁見過隻靚到「嘩！」郵輪無？原來呢艘號稱全亞洲第一郵輪，由現在起一直至 9月底，將本來航行湛江的行程改行三亞，於是我趁住有幾日假， join一個四日三夜三亞、下龍灣 tour，希望呢個較長的旅程，令我可體驗真正的郵輪假期的滋味，好讓我為我們計劃的郵輪蜜月之旅作好準備。雖然呢幾日無得去買 CK、 LV，無得玩過山車、跳樓機，只係遊山玩水，食飯覺，同閒時出去海景露台晒太陽、聽浪聲，想起你，原來已經好滿足。
記者：朱維達
鳴謝：麗星郵輪
■來自瑞士 Weber Werner話郵輪上好乾淨，設施亦屬於高水準 It's very nice！
瞭望台酒廊 180O景觀
入到房間放好行李就即刻帶埋相機去到十二樓露天羅馬式泳池，當日陽光普照，池水泛光，無三點式女仔戲水聲，只聽到四角處按摩池噴水聲。
不過中間泳池 Size就細，好似我昂藏過六呎高個子，分分鐘可以話畀人聽我游十幾個塘。之但係按摩池就真係夠煞食，由日頭噴到夜晚一點，我都急不及待，立時寬衣解帶，實行浸到皺皮為止！
雖然六樓至十三樓都有唔同娛樂設施，但係愛動又好靜我始終最鍾情十二樓瞭望台酒廊，呢間餐廳最好日間到訪，因為個近乎 180°觀景窗設計，你可以呷住咖啡之餘，亦可同時觀賞船隻航行時景觀，船頭處更有兩塊顯示板，正確指示出當時郵輪航行方向、風速、速度同位置等，夜晚到訪時更有 Live Band演出。心諗，如果當時你倚在我身旁，那有多完美？
■船尾小海盜水上樂園，係遊戲機中心、電腦世界同護幼中心另一選擇。
■除 180°觀景玻璃窗設計，你重可以沿瞭望台酒廊落去船長室，隔著玻璃參觀船員操控郵輪過程。
海南島三亞遇上三亞之花
今次四日郵輪之旅不會呆坐船上，除前後一日船程，中間兩日可以參加中國三亞及越南下龍灣 Tour，兩個地方亦會有唔同行程選擇。就如三亞團會有五個唔同行程，我就揀亞龍灣，貪佢多自由時間。
由於當地港口水深較淺，所以每次都會用上接駁船往返碼頭，再由碼頭坐巴士到各觀光點，正如我預期，珍珠養殖島、蝴蝶谷、貝殼館都沒啥特別，但旨在睇睇海南島最南、中國最南三亞亞龍灣。當地面向南中國海，經常睇到三層巨浪，莫怪乎呢度有咁多水上活動設施可以租用。日遇上一位自蘭州小姐，佢原來都係山長水遠度假，旨在散散心而已。當我請佢影番張相時，佢已經好似職業 Model咁擺晒 Pose。但請你放心，雖然佢已經係三亞之花，相比起你，仍差一大截！
團名：亞龍灣自助燒烤晚膳
團號： LSYX-D
費用：成人$350、小童$330
行程內容：珍珠養殖場、蝴蝶谷、亞龍灣廣場、貝殼館、亞龍灣自由活動、自助燒烤晚膳及欣賞民族歌舞表演。
歷時：約 5小時
亞龍灣水上活動
水上電單車 150元人民幣? 10分鐘
滑水板 150元人民幣? 10分鐘
快艇 200元人民幣?一次
遊覽白虎角 400元人民幣?一次
■自蘭州，一副 Model格徐小姐：「我呢度係度假，覺得亞龍灣點？……好舒服喲！」
■行程中燒烤晚宴，會同場加演民族歌舞娛賓。
越南遊艇穿梭 1969個怪狀島
過一晚，郵輪已經抵達越南下龍灣，我參加一個遊艇旅行團。 90分鐘旅程中， 2層高遊艇會 1969個島嶼中穿插，雖然好人導遊哥哥向我介紹島嶼形狀時，梗係要話呢個似隻茶壺、個又話像塊鬼面，我就一都想像唔到，不過最欣賞係海上波紋，微風吹拂同古舊引擎聲，好似再沒有甚麼比這更美妙了！間中其他船家會駛著舢舨將剛撈獲的海鮮向船上遊客兜售，一大碟大蟹不過約 20蚊港紙，跟住可以請遊艇船員替你即炒，又諗起怕敏感又鍾意食海鮮你……點解呢幾日一個人坐船都總係掛住你？或者真係因為掛住你啦！
Love Victor
團名：海上遊＋岸上活動（越式午膳）
團號： LHAL-A
費用：成人$250、小童$230
行程：下龍灣海上遊、拜雀市購物或於皇家海岸公園欣賞水上木偶及民族歌舞表演。
歷時：約 4小時
■遊艇旅程期間，不時會有其他船家向你兜售生果及海鮮。
■同行黃小姐：「遊下龍灣感覺好似遊桂林麗江咁，好靚！」
獅子星號資料
排水量： 75,338噸 客房： 983間
容納人數：約 2,800人
設施： 14間餐廳、酒廊、羅馬式泳池、男女蒸氣及桑拿浴室、美容及髮型屋、電影院、的士高、夜總會、卡拉 OK、購物廊及紅磨坊歌劇院等。
出門提一提
簽證：持回鄉證到中國毋須簽證；持 BNO、特區護照者到越南均須簽證，郵輪公司會為你辦妥越南簽證事宜，報名時需出示旅遊證件。
旅行團：可參加獅子星號四日三夜三亞、下龍灣之旅，逢星期日出發，海景露台客房每位$3,199，電話： 2317 7711（麗星郵輪）。
■位處十二樓古羅馬式泳池雖然開放至凌晨一時，但夜間海風較強勁，夜「游」一族請注意！